محطة الواحد والثلاثين

في شي هاي السنة غير، مستوى الدراما عندي ارتفع، وعيد ميلادي صار يعنيلي. ???
 
اه مزبوط، اه انا اللي كاتب وحاكي ومحلل اجتماعيا ونفسيا ومتفزلك عليكم ليش عيد ميلادي ممكن ما يعنيلي، صار اليوم يعنيلي، وصارت تعنيلي أكثر معايداتكم، فتنسوش
 
السطور أدناه، مربوطة باليوم والساعة اللي كتبت فيها، ولا يمكن إسقاطها على ما قبلها ولا ما بعدها من سنين. شكرا لتفهمكم.?
 
أسامة أخوي بحكيلي اني صرت عاطفي أكثر، هوي مش حكالي بس، هوي نكش الموضوع زي كأنه مشكلة، وقاللي قديش تغيرت عن كيف كنت عقلاني، وما كانتش العاطفة حاضرة بتفكيري وحكيي وهيكا. بفكر اه، مزبوط، ويمكن صرت دراما أكثر كمان.
 
ياسر اللي رافقني آخر خمس سنين، زهق من دورة الكآبة السنوية التقليدية تبعتي، وزهق من قديش بكرر نفس الأفكار، ويمكن حتى الجمل، شفتها قبل أيام بعينه وبلحظة كنت بدي أحكيله اللي بحكيه كل سنة، قبل ما يكون صريح معي من غير أي مراعاة للدراما تبعتي، انه اه كلها كم شهر وبتصير أحسن ان شاء الله.
 
المشكلة انه صرت واعي لهاي المرحلة من العمر، وصارت مملة لالي حتى، بس كمان اظن اني سلمت الراية لياسر وهوي بلش يدخل في الرحلات السنوية في عالم المراجعات والكابة السنوية التقليدية، ويمكن هوي مش واعي لسه، وحتى لو حكيتله، حيحكيلي اللي كنت بحكيله إياه وبحكيه لغيره من الناس اللي حاولت تهون علي بطريقة مفش فيها دراما كنت بفكر انها متسحقة لالي وأقل واجب يعملوه معي. ?
 
بلشت ذكرياتي ولحظات مهمة كثيرة بحياتي تصير بلا أي معنى لشباب وأجيال أصغر، وصرت ألاقي حدا بحكيلي عن حدث كثير مهم في حياتي انه ملوش أي معنى، والتنويه بانه اذا ما عاشوا ما بينتقص منه، لانه مش صغير وعاش غير الحدث اللي بحكي عنه حضرتي كثير.
 
يعني تخيل انه لما بحكي عن أهم فترة بحياتي، واللي كل شي فيّي اليوم تأسس وتعزز فيها، بحكي عن فترة الانتفاضة الثانية، واللي كانت قبل تقريبا ٢٠ سنة، يعني صار في تقريبا كومة أجيال مش رح يحسو عن شو بحكي، ولا ممكن يستوعبه شو الأثر النفسي اللي وقع علي فيها ومنها، عشان يتعامل معي بذوق أكثر من انه يحكيلي “خلص تجننيش بالانتفاضة الثانية”، بمعنى اخر بلاش دراما. ?
 
أبوي وإمي صارو صحابي، وصار في شي زي تغيّر وتبدل أدوار في العلاقة على مستوى عاطفي، بس مع هيك لساتهم نقطة الأمان والمعنى الحقيقي للسند غير المشروط واللي بتجاوز أي توقعات، اللي بخليني أخوض أي مغامرة، بس كمان صارو يحضرو في بالي أكثر وانا بفكر بأي مغامرة، صار لازم أحرص أكثر ما ينزعجوش ولا بأي شكل من أي جنون ممكن اعمله.
 
مع خطبة أختي رجاء الصغيرة، يمكن بقدر أقول استوت علاقتي بأخوتي كلهم، كل حدا صار عنده مساحته وشكل حياته، والمساحات العاطفية المشتركة قاعدة بتصير أقوى وأمتن.
 
بفضل أختي الاء كسبت أخ مثل أخوي أسامة في العيلة اسمه عزام، وقاعدين بنكسب اليوم أخ جديد اسمه شادي.
 
عيلتي كثير مهمة الي، وتأسيس عيلة كيف بنعرفها بعزوتها وناسها وتقاليدها وغيرتها على بعضها اشي كثير مهم.
 
علاقتي مع اصحابي بطلت قائمة على توقعات كيف كانت أول، فصارت كثير أحسن وبطل فيها “فوق وتحت” كل فترة قصيرة، وصار العتب ع قد المحبة مش التوقعات، بس كمان لساتني بعرّف الصاحب صاحب الحواري والظروف اللي ربينا فيها، واللي مليان معاني أخوة وجدعنة ورجولة، وهيكا.
 
قضيت حياتي، بصاحب الأكبر مني، وبدور على اللي عنده تجربة أكثر مني لأتعلم منه، بدافع كبير من الغيرة والحب لقطع أشواط مبكرة وحرق مراحل، يمكن طولي ساعدني لفترة لأفرض حالي كحدا كبير وانا صغير، لحد ما صرت أراكم تجارب اللي حولي مع تجاربي، وأضل أراكم وأضاعف، وأفرض حالي بمراحل بتسبقني، كحدا دايما اكبر مش بس كبير.
 
من سنة وشوي، صار متعب حرق المراحل، يمكن لأني صرت أميز انه حرق المراحل مش قاعد بعفيني من استحقاق المراحل اللي بحرقها، فصار الحمل كبير، ومتعب، فجربت اعمل “ستوب”، وأقول خليني باللي عندي، وبكل تواضع أقول مش رح أضل أنط، لأني يا دوب قادر أتعامل مع وين انا اليوم.
 
يمكن حاليا في معادلة جديدة، انه بكفي مراكمة، ومش غلط نطات خفيفة ومحسوبة كل فترة، مع الحفاظ على العيون ١٠ سنين للوراء، عشان نضل محافظين على الروح الشباب، وصولا لنموذج الختيار الشب، اللي ممكن تكون عيون الشباب كلها عليه كصورة لشكلهم بعد سنين، وبعيون الختيارية اللي من عمره، بعتبروه “الختيار اللي مش محترم شيبته”.?
 
انتهى. ?
 
بالمناسبة، رح أجرب كل أسبوع أصفنلي صفنة، وأحكي عن حدا مهم في مسار حياتي، وكيف كان أثره علي، حتى لو بلحظة، رح أجرب أشوف اذا فعلا صاير عاطفي بزيادة، واذا فعلا صحيح، رح أفجرها فيكم وعليكم بقلوب كثيرة وحب كثير وهيكا.
 
هاي الصورة أحلى صورة هالسنة، أبوي على ظهري في إجازة وفي بركة سباحة وفي بلد عشاق، بلد بتستوعب الأصحاب اكثر من العائلات.

استنونا الخميس ... #بودكاست_تقارب #والنعم_والنعمتين ...

61 4

العكوب لا يُعطا المقلوبة 😂 #مقلوبة_مباركة #بودكاست_تقارب #والنعم_والنعمتين ...

47 3

"نسخة تجريبية"، هكذا تجد كتب المنهاج الفلسطيني معنونة، للحفاظ والتأكيد على فرص التطوير المستمرة، وذلك وسط متغيرات سياسية داخلية تجد طريقها للكتب، وتأثيرات الممول والسعي لنيل رضاه، هذا غير رقابة الاحتلال ومؤسساته.

الحلقة ٥٤ من #بودكاست_تقارب مع مي أبو مغلي و"صناعة المناهج".

روابط الحلقة في البيو، وتجدونها قي اليوتيوب ومنصات البودكاست
...

19 0

استنونا الخميس في الحلقة ٥٤ من #بودكاست_تقارب مع مي أبو مغلي وحوار عن صناعة المناهج الفلسطينينة. ...

51 0

استنونا الخميس #بودكاست_تقارب #والنعم_والنعمتين ...

33 0

تعودت أغرّق حالي بكثير تفاصيل وأضل أفكر فيها لحد ما أمرقها، ومع الوقت صرت أحس منيح طول ما أنا غرقان، وبس يسألني صاحب شو أخبارك، الإجابة بإني "غرقان بالشغل" هيي مفتاح الحالة.

بعد عمر قليل، لقيت إنه الغرق في الشغل سبقه غرق بكثير أسئلة عن المستقبل والطموح وشو بدك تكون، ورح يضل ينضاف عليها كثير تفاصيل لقدام، لتصير إجابتي: غرقان بالشغل والدراسة ومع العيلة والاولاد و .... الخ، مش كيف حاسس معهم.

لما يتحول الغرق بحد ذاته للشعور المرافق بأغلب محطات حياتك، بلاقي حاله الوحد مش مقدر إنه أخد ترقية في الشغل لحد ما صديق يقوله ليش مش مبسوط؟! هوي أنا مبسوط بس بفكر بالشغل!

وبتلاقي حالك بتحكي مع حالك ع طاولة الأكل مع العيلة وانت بتفكر بمستقبل العيلة، محتاج حدا ع الطاولة يحكيلك إنك حكيت مع حالك من شوي، عشان تفتح عينيك وتشوف قدام عينك العيلة اللي المفروض تنبسط معها اليوم.

وبتخسر شريكة محتملة وانت بتغرّقها معك في شكك وقلقك أكثر من اهتمامك ومحبتك، وبس تقولك بديش هذا الغرق وكل هاي الهدايا، بتنصدم، وبعد شوية وقت بتصحى ع حالك، وبتشوفها غرقانة بتفاصيل كفاية، مش ناقصها.

ما حدا فينا بعيد عن هاي المعادلة، هاي الحياة اللي بنعيشها وبنلعب فيها، واحنا خايفين من شكل المستقبل، بنخسر يومياتنا، وبنخسر تفاصيل بين إيدينا وإحنا بنركض ورا بكرة، بنميزش حتى الخسارة لأنه عنا خوف من كمان خسارة، ولأنه عيننا لقدام بعيد.

إحنا أولاد القلق الدائم، ورثناه وربينا وكبرنا عليه، حتى لو ما كان اله أسباب حاضرة اليوم، كل حدا فينا بطلع ع حاله أو عنده صديق بشوفه من بعيد مش ناقصة شي، بس كمان قلقان، وبالأغلب بخسر فرص بسبب قلقه بس.

ما بتميز هذا الحكي غير لما تفصل عدادات راسك تماما عن التفكير والعد والحسابات، والمشكلة إنك بتعرفش أو بتخاف تفصلها، فبدك الحظ يحطك بظروف تفصلك وتهدّي بالك شوي.

بالمناسبة، الله يهدّي بالك، من أجمل الدعوات اللي بتمس الواحد فينا من جوا.

الله يهدّي بال الجميع. ❤️

📸 : @mahmoud.a.badawi
...

441 40

فش صوت مش مهم، قوم ارقص عليه. ...

173 16

‏حاورت سامي أبو شحادة في الحلقة الثانية من #بودكاست_تقارب قبل عام ونصف حول العمل السياسي في أراضي ال٤٨ وتحدياته.

‏أعيد نشر الحلقة اليوم بالتزامن مع محاولات تصفيته سياسيا، ولما فيها من حديث كأنه سُجل اليوم.

‏رابط الحلقة الثانية في البيو وتجدونها في اليوتيوب ومنصات البودكاست.
...

562 2
المقلوبة رهاننا الرابح 😎 #مقلوبة_مباركة #بودكاست_تقارب #والنعم_والنعمتين

المقلوبة رهاننا الرابح 😎 #مقلوبة_مباركة #بودكاست_تقارب #والنعم_والنعمتين ...

29 0